Ilmalõpust ütte- ja tõistpidi
TORUPILLI-ANTSU JUTU
Juhime tähelepanu, et artikkel on rohkem kui viis aastat vana ning kuulub meie arhiivi. Ajakirjandusväljaanne ei uuenda arhiivide sisu, seega võib olla vajalik tutvuda ka uuemate allikatega.
Nüid omgi sis kähen sii 2012. aaste, ku pias mailma lõpp tuleme. A Igor Mang ütel, et ei tule. Mia mõtle, et Mang, sa olet tark miis küll, aga ei tää, kas sa ikki täppi panet. Kikki asju või ju mitme kandi päält kaia. Üte inimese jaos om maailma lõpp joba sii, ku raha saa otsa, tõse jaos om, ku viin om otsan ja puut kinni, viil ullemb ku naene lask kodust jalga.
Sii aaste lõpun ollu torm Patrick olli ju kah nigu mailma lõpp. Piaaigu 100 000 elämist olli ilma voolute, egän taren om keskmiseld neli inimest — no sii om ju joba piaaigu puul Eesti rahvast! Miu sii Patrick vist pelläs, miul ta pand vuulu viil manugi, kik tule lätsive nõnda eles ja esiki vetsu põrmandu pääld sai särtsu, ku pallaste jalgege lätsit.
Me siin poisige kõndseme kik liini läbi ja saime ädä tääda kah: traat olli ravvast kanduri pääle sadanu ja sääld sii suur vuul meile tulligi. A naabretalun oid elektrekabel kogundi puud üleven. Tõisen liini otsan olli juhe nigu purki pantu — ei tää, kas vanamiis lämites sedäsi abemeaamise vett? Ja posti otsan om juhe pallald paari traadijupige ümmer käänetu. Kuda ta sis püside saa? Ku järgmine torm tule, om kik jälle mahan. Aga me ju massame Eesti Energiale selle iist, et liini kõrran oles. A ku midägi ei tetä, sis sii raha mudku summus sinna kokku.
Ma ole mõtelnu, et kost neil tormel ja tornaadodel nii nime tuleve. Üits om Monica, tõine om Friedrich ja nüid olli Patrick. Teedä om, et nii om ju rikka inimese, kes tahtva oma nime kuulsas saia, massave kõvaste ja saavegi omanimelise tormi. Paist sedämuudu, et midä kõvembe rahakotige miis om sedä nime endele sääld ostnu, sedä kõvemb torm kah tule. Mia küll pelgä, et kui nii Eesti Energia mihe kah omale sedä nime akkave ostma, sis käänd küll kik selle Mangi ennustuse pää pääle. Kae, ku tulepki 21. detsembrel äkki torm nimege Sandor!